ភ្នំពេញ៖ នគរបាលរាជធានីភ្នំពេញ ស្នើនគរបាលរដ្ឋធានីប៉េកាំង បណ្ដុះបណ្ដាលជំនាញ គ្រប់គ្រងចរាចរណ៍និងប្រដេញតាមចាប់ជនល្មើសតាមវិថីរួមទាំងឧបករណ៍សម្ភារៈគាំទ្រប្រតិបត្តិការមួយចំនួនទៀត។

ក្នុងកិច្ចប្រជុំនៅរសៀលថ្ងៃទី២៩ ខែកញ្ញា ឆ្នាំ២០២១នេះ ស្នងការដ្ឋាននគរបាលរាជធានីភ្នំពេញ ដឹកនាំដោយ លោកឧត្តមសេនីយ៍ឯក ស ថេត បានជួបប្រជុំតាមអនឡាញ ជាមួយស្នងការដ្ឋាននគរបាលសន្តិសុខសាធារណៈទីក្រុងប៉េកាំងដឹកនាំដោយ អភិបាលរង និងជាស្នងការក្រុងប៉េកាំង លោក ឈី យ៉ាន់ជុន ។

ក្នុងកិច្ចប្រជុំនោះ ស្នងការនគរបាលរាជធានីភ្នំពេញ លោក ស ថេត បានស្នើដល់ស្នងការដ្ឋាននគរបាលសន្ដិសុខសាធារណៈទីក្រុងប៉េកាំង ជួយបណ្តុះបណ្តាលមុខជំនាញឯកទេសមួយចំនួនដូចជា ការបណ្តុះបណ្តាលជំនាញស្រាវជ្រាវបង្រ្កាបបទល្មើសបច្ចេកវិទ្យា ជំនាញឯកទេសគ្រប់គ្រងចរាចរណ៍និងប្រដេញចាប់ជនល្មើស ជំនាញស្រាវជ្រាវ និងបង្រ្កាបបទល្មើសគ្រឿងញៀន។

លោកស្នងការក៏ស្នើដល់ភាគីចិនឱ្យជួយបំពាក់ឧករណ៍សម្ភារៈ គាំទ្រប្រតិបត្តិការមួយចំនួនដូចជា ម៉ាស៊ីនផ្ទុកទិន្នន័យ ០១គ្រឿង សម្រាប់គ្រប់គ្រងទិន្នន័យរបស់ស្នងការដ្ឋាននគរបាលរាជធានីភ្នំពេញ កាមេរ៉ាខ្នាតតូចបំពាក់ជាប់ខ្លួន កាមេរ៉ាថតពីចម្ងាយ GPS ចល័តបង្កប់លើយានយន្ត បំពាក់កាមេរ៉ាចល័តនិងអចល័តតាមដងផ្លូវ និងលើរថយន្តនគរបាល។

ឆ្លើយតបតាមការស្នើសុំរបស់ស្នងការនគរបាលរាជធានីភ្នំពេញ ភាគីចិន លោក ឈី យ៉ាន់ជុន បានឯកភាពនិងទទួលយកសំណើរខាងលើដើម្បីពិនិត្យសម្រេចក្នុងការផ្តល់ជូនផងដែរ។

កិច្ចប្រជុំថ្នាក់ដឹកនាំនគរបាលរាជធានីភ្នំពេញ និងប៉េកាំងនេះគឺធ្វើឡើងបន្ទាប់ពីមានការឯកភាពរវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈនៃសាធារណៈរដ្ឋប្រជាមានិតចិន ស្ដីពីកិច្ចសហប្រតិបត្តិការរឹតចំណងមេត្រីភាពរវាងគ្នានិងគ្នាធ្វើឡើងកាលពីថ្ងៃទី២៧ ខែវិច្ឆិកា ឆ្នាំ២០១៧។

កិច្ចប្រជុំនេះ ធ្វើឡើងដើម្បីជំរុញពង្រឹងចំណងសាមគ្គឺភាពរវាងកម្ពុជា-ចិន ឱ្យកាន់តែរឹងមាំក្នុងការលើកកម្ពស់ប្រសិទ្ធភាពនៃកិច្ចសហប្រតិបត្តិការក្នុងការប្រយុទ្ធប្រឆាំងបទល្មើសឧក្រិដ្ឋឆ្លងដែនគ្រប់ប្រភេទ ជំរុញកិច្ចសហប្រតិបត្តិការផ្លាស់ប្តូរព័ត៌មាននិងទាន់ពេលវេលា ជាពិសេសព័ត៌មានដែលពាក់ព័ន្ធមុខសញ្ញាភេវរកម្ម ការជួញដូរមនុស្ស ការជួញដូរគ្រឿងញៀន បទឧក្រិដ្ឋឆ្លងដែន ក៏ដូចជា ជំរុញកិច្ចសហប្រតិបត្តិការព័ត៌មានពាក់ព័ន្ធមុខសញ្ញាសម្អាតប្រាក់ និងហិរញ្ញប្បទានភេវរកម្មផងដែរ៕